Presse aktuell 2011 Die Oberbadische vom 10.5.2011 Dr Wiigeischt Hebeltag Früehjer isch am 10. Mai nit numme z Lörrech, z Basel oder z Huuse im Hebel si Geburtstag gfiirt worde. Ich cha mi no guet erinnere, wie vor fufzig, sechzig Johr in de Markgräfler un sicher au in de Wiesetäler Dörfer für dr Dichter un Chilchemaa Johann Peter Hebel Gedenkfiire abghalte worde sin. Mir isch in Erinnerig bliebe, daß dr 10. Mai eine vo de schönste Schultag im Johr gsi isch. In dr freie Natur bi früscher Maieluft hei mir e halbe Tag oder mehr Naturlehre gha zwüsche Margritli, Zitterli un Suurampfer oder im schattige Wald bi duftige Maiglöckli. Dr Lehrer isch mit siinere Klass dur Wald un Flur gwanderet, me het sich viillicht mit Schüler us dr Nochbergmei troffe - hüt treffe si sich scho am Morge im Schuelbus mit em „Händy“ am Ohr -, es sin Hebelgedichter vortrait worde, un me het „z'Mülle an dr Post“ gsunge. Dr 10. Mai isch für uns Schüeler wie e Ferietag gsi. Un glaubet's mir, liebi Leser, wenn dr Johann Peter Hebel siini Wurzle äne am scho bol vergessene iiserne Vorhang hätt, no chönnt me hüte no in jedem Lesebuech vo de Grundschüeler de lehrriiche un unterhaltsame Lesestoff als soundsoviilti Lektion finde, un es wurde au no Hebelgedichte uswendig glehrt, meint dr Hage