Presse aktuell 2013


 BZ vom 3.8.2013

LUEGINSLAND: Ikone

Scho sin bal wider drei Johr umme siter em große Hebel-Jubiläum 2010, siter sim 250. Geburtstag. Was isch blibe dävo? S Dichtermuseum z Huse, de Hebel-Weg de Wiese entlang, e Schwiizer Briefmarke, zwei intressanti Hebel-Biografie, die eindi vo de Heide Helwig un die ander vom Bernhard Viel: "Johann Peter Hebel: oder das Glück der Vergänglichkeit" . Isch d Vergänglichkeit e Glück?

Z Lörrach-Stette an re Muur vor re Garaasch sin d Bilder vo vir Ikone druf gschprayt: vom Jim Morrison, dem großartige Sänger vo de "Doors" , wo mit drei Gedichtbänd zeigt hät, wie subtil er cha umgoh mit de Sprooch un wo mit grad emool 28 an sim "selbstzerstörerischen Lebensstil" kaputt gangen isch; vom Frank Zappa, dem Rockstar, wo au e Dichter gsi isch mit siine böse Text gege Rassismus, religiöse Fanatismus un Chriegshetzerei, vom Michael Jackson, wo für viili de gröschti Star in de Musikszene überhaupt isch un wo vo Chrankete un Stress schlooflos un verfresse elend an Tablette drufgangen isch; un vom Johann Peter Hebel. Morrison, Zappa, Jackson, Hebel. Worum?

Hät ämend "der allzeit vergnügte Tabakraucher" Hebel, de "Knaschter" , dä, wo amig gern e Virteli, zwei, drei gschlotzt hät, eso in d Reihe dri passt vom Heroiniker, vom Zigarette un Kaffi-Süchtige un vom Tabletteabhängige? Oder ghört er wege siine unsterbliche Text in d Reihe vo däne Größe? Wär er hüt e Star, well er sellemools scho agschribe hät gege Rassismus (Moses Mendelson) un Fanatismus (Der große Sanhedrin zu Paris), gege Chriegshetzerei (Der Schmelzofen,) Egoismus un Oberflächlichkeit (Der Karfunkel)? D Antwort: Leset "Die Vergänglichkeit" , wo zum Glück sit 210 Johr unvergänglich isch.

Markus Manfred Jung